Cefnogi sicrwydd byw EPS yng Ngogledd Cymru: diwrnod mewn practis

Gan Mark Allen, Arweinydd Cenedlaethol Gwybodeg Glinigol, a Jonathon Campbell, Arweinydd Moddion Digidol Meddyg Teulu, DMTP

Yn ddiweddar, ymwelom â Phractis Meddyg Teulu Bodowen yn Nhreffynnon, Gogledd Cymru, i gefnogi sicrwydd byw system ddosbarthu a alluogwyd ar gyfer y Gwasanaeth Presgripsiynau Electronig (EPS). Roedd hyn yn cynnwys gwirio sut roedd y system yn gweithio mewn ymarfer bob dydd, ochr yn ochr â'r staff sy'n ei defnyddio i ddarparu gofal i gleifion.

Rhoddodd yr ymweliad gyfle inni weld sut roedd EPS yn cyd-fynd â phrosesau rhagnodi a dosbarthu dydd i ddydd y tîm.

Mae practis meddyg dosbarthu yn gweithredu'n wahanol i fferyllfa gymunedol. Ym Mhractis Meddyg Teulu Bodowen, mae'r gwaith o ragnodi a dosbarthu yn digwydd o fewn yr un practis, drwy ei fferyllfa ddosbarthu ar y safle. Roedd yn arbennig o werthfawr gweld sut roedd y dechnoleg yn cefnogi'r daith gyfan, o ragnodi i ddosbarthu, o fewn un sefydliad.

Tynnodd yr ymweliad sylw hefyd at sut y gallai EPS fod o fudd i'r practis ehangach. Mae symud oddi wrth brosesau presgripsiynau papur yn cynnig y potensial i leihau gwaith gweinyddol, symleiddio llifoedd gwaith presgripsiynau a gwella effeithlonrwydd, yn ogystal â darparu gwasanaeth mwy llyfn i gleifion.

Drwy ymestyn EPS i gleifion sy'n derbyn eu meddyginiaethau o fferyllfa ddosbarthu'r practis, mae Practis Meddyg Teulu Bodowen yn helpu mwy o gleifion i elwa ar ragnodi digidol. Mae hyn hefyd yn rhoi cyfle i'r practis ddefnyddio proses fwy cyson ar draws ei wasanaethau rhagnodi a dosbarthu.

Tynnodd y diwrnod sylw at bwysigrwydd sicrhau bod cymorth technegol ar gael wrth gyflwyno prosesau digidol newydd. Roedd angen cymorth ychwanegol i ffurfweddu argraffydd ar gyfer argraffu tocynnau EPS, a bu hynny'n achosi rhywfaint o oedi. Mae tocynnau EPS yn gopïau papur o fanylion presgripsiynau electronig, y gellir eu hargraffu pan fo angen cyfeirnod papur ar staff i gefnogi'r broses ddosbarthu. Mae'r presgripsiwn ei hun yn parhau'n electronig. Roedd hyn yn darparu gwers ddefnyddiol ar gyfer gweithrediadau yn y dyfodol.

Er gwaethaf yr her hon, parhaodd tîm y practis yn frwdfrydig ac yn gadarnhaol drwy gydol y dydd. Daeth y staff yn gyfarwydd â'r prosesau newydd yn gyflym a gallent weld y manteision posibl i gleifion a'r practis ehangach. Roedd eu parodrwydd i groesawu'r newid a rhannu adborth wrth ddefnyddio'r system yn fyw yn amhrisiadwy i'r broses sicrwydd.

Hoffem hefyd ddiolch i Paul o Enlivio Health, a ddarparodd hyfforddiant a chymorth ymarferol i dîm y fferyllfa ddosbarthu. Bu'n gweithio'n agos gyda'r staff i ateb cwestiynau a helpu i ddatrys problemau wrth iddynt godi.

Mae cyflwyno EPS mewn amgylchedd meddyg dosbarthu yn gofyn am ddealltwriaeth o'r ffordd y mae prosesau rhagnodi, dosbarthu a gweinyddol yn gweithio gyda'i gilydd. Mae cydweithio agos rhwng timau practis, cydweithwyr digidol a chyflenwyr systemau yn hanfodol.

I ni, roedd treulio amser yn y practis a gweld y prosesau hyn ar waith yn rhan bwysig o asesu sut mae'r system yn cefnogi defnydd diogel, ymarferol ac effeithiol o EPS yn yr amgylchedd hwn.

Diolch i bawb ym Mhractis Meddyg Teulu Bodowen am eu croeso cynnes, eu hagwedd agored a'u brwdfrydedd, ac am eu hymrwymiad i ymestyn manteision EPS i'r cleifion sy'n defnyddio fferyllfa ddosbarthu'r practis.