Prosiect darganfod yn nodi saith blaenoriaeth ar gyfer iechyd meddwl

Medi 19eg 2024

Mae ail gam prosiect darganfod iechyd meddwl wedi nodi saith blaenoriaeth allweddol i wella gwasanaethau iechyd meddwl yng Nghymru. Dan arweiniad Iechyd a Gofal Digidol Cymru, mae’r prosiect yn canolbwyntio ar sut i ddefnyddio digidol, data a thechnoleg i ddiwallu anghenion unigolion yn well a chyflawni canlyniadau gwell.

Yn 2023, bu IGDC yn gweithio gyda sefydliadau sy’n darparu gwasanaethau iechyd meddwl yn rhanbarth Cwm Taf Morgannwg i ddeall yr heriau maen nhw’n eu hwynebu. Canfuwyd problemau gyda chael mynediad at ddata a’i rannu, diffyg gwybodaeth gyfredol am alw a chapasiti, a’r angen am gofnod iechyd electronig Cymru gyfan i wella cynllunio a gofal.

Ar ddechrau 2024, rhannodd IGDC y canfyddiadau hyn â’r chwe rhanbarth a sefydliad cenedlaethol arall sy’n ymwneud â darparu gwasanaethau iechyd meddwl. Defnyddiwyd y canfyddiadau i greu darlun cenedlaethol o’r heriau a’r cyfleoedd i wella gwasanaethau iechyd meddwl.

Dangosodd ail gam y prosiect fod rhanbarthau gwahanol yn defnyddio modelau gwahanol i ddarparu gofal. Mae hyn yn arwain at ganlyniadau iechyd anghyfartal ac yn cyfyngu ar rannu data, oherwydd y diffyg adnoddau digidol sy’n cael eu defnyddio mewn gwasanaethau iechyd meddwl i gasglu data cyson. Pwysleisiodd y prosiect hefyd fod angen rhoi’r un flaenoriaeth i iechyd meddwl ag sy’n cael ei roi i iechyd corfforol.

Dywedodd Sam Hall, Cyfarwyddwr Gwasanaethau Digidol Gofal Sylfaenol, Cymunedol ac Iechyd Meddwl, IGDC: “Mae darparu gwasanaethau iechyd meddwl o safon yn weithgaredd cymhleth ac aml-sgil, sy’n cwmpasu ystod ehangach o wasanaethau y tu mewn a’r tu allan i GIG Cymru. Fe wnaeth y gwaith darganfod hwn ein helpu i ddeall beth sy’n ‘rhaid ei wneud’ i wella’r gwasanaeth i’r rhai sydd ei angen a’r rhai sy’n ei ddarparu. Rwy’n falch iawn bod y Rhaglen Strategol ar gyfer Iechyd Meddwl wedi’i sefydlu a bydd yn gyfrwng i helpu i fynd i’r afael â chanfyddiadau’r cam darganfod pwerus hwn.”

Datblygwyd saith blaenoriaeth i drawsnewid gwasanaethau iechyd meddwl

1. Safoni darpariaeth gofal - Gweithio gyda byrddau iechyd i ddefnyddio digidol a data i safoni’r ffordd y darperir gofal. Bydd hyn yn gwella rhannu gwybodaeth ac yn helpu i ddarparu gofal mwy cydgysylltiedig.
2. Cofnod gofal dinesydd integredig - Mae angen cymorth brys ar bobl mewn argyfwng a gallant ei chael yn anodd ailadrodd eu hanes. Byddai cofnod gofal dinesydd integredig yn dilyn person trwy eu taith ofal, gan leihau’r angen i ailadrodd gwybodaeth.
3. Offer digidol ar gyfer gofal - Gyda llawer o sefydliadau’n cynnig gwasanaethau iechyd meddwl, gall fod yn ddryslyd dod o hyd i’r cymorth cywir. Gall offer digidol arwain pobl at y gwasanaethau cywir a’u helpu i reoli eu hiechyd a’u lles eu hunain.
4. Hyder digidol - Defnyddio offer digidol yn hytrach na chofnodion papur, a sicrhau bod ymarferwyr, cleifion a’r cyhoedd yn teimlo’n hyderus wrth eu defnyddio. Bydd hyn yn arwain at well rhannu gwybodaeth a diogelwch, a chanlyniadau gwell i gleifion.
5. Set ddata genedlaethol ar gyfer iechyd meddwl - Creu safonau cyson ar gyfer casglu data ar draws gwahanol wasanaethau a rhanbarthau i greu darlun cenedlaethol o’r galw am wasanaethau iechyd meddwl. Mae dau fwrdd iechyd yn treialu set ddata iechyd meddwl genedlaethol ar hyn o bryd.
6. Cynhwysiant digidol - Datblygu strategaeth i sicrhau bod pawb yng Nghymru yn gallu cael mynediad at wasanaethau digidol. Mae IGDC wedi cael ei ganmol am ei waith yn hyrwyddo sgiliau digidol ac yn helpu pobl sydd wedi’u hallgáu’n ddigidol.
7. Achosion busnes wedi’u cyd-gynhyrchu - Defnyddio mewnwelediadau o achosion busnes blaenorol i ganolbwyntio ar y buddion y gall offer a data digidol eu darparu.

Bydd y saith blaenoriaeth hyn yn rhan o ffrwd waith digidol a data, a oruchwylir gan y Rhaglen Strategol ar gyfer Iechyd Meddwl. Bydd ymgysylltu pellach yn digwydd gyda rhanddeiliaid i ddatblygu darlun manylach a rhoi argymhellion y cam darganfod ar waith. Bydd dinasyddion a defnyddwyr gwasanaethau hefyd yn gallu rhannu eu profiad o gael mynediad at wasanaethau iechyd meddwl.