Iechyd a Gofal Digidol Cymru (DHCW) ar restr fer Gwobrau GO

18 Hydref 2022

Mae tîm caffael DHCW wedi cyrraedd rownd derfynol Gwobrau GO Cymru, sy’n dathlu cyflawniadau caffael ar draws sefydliadau cyhoeddus, preifat a thrydydd sector Cymru.

Mae’r tîm wedi cyrraedd rownd derfynol y categori caffael cydweithredol am eu gwaith ar Gytundeb Menter Microsoft Cymru Gyfan. Dros y deuddeg mis diwethaf, mae DHCW wedi gweithio gyda byrddau iechyd ac ymddiriedolaethau i sicrhau'r cytundeb pum mlynedd i ddarparu'r cynhyrchion, offer a gwasanaethau Microsoft diweddaraf i GIG Cymru.

Dywedodd Matthew Perrott, yr Uwch Arweinydd Caffael, “Cafodd y tîm negodi ei gefnogi gan arweinwyr digidol, cyllid a thechnegol o bob rhan o Gymru, a hebddynt ni fyddai’r fargen wedi bod yn bosibl. Mae’r enwebiad hwn am wobr yn gydnabyddiaeth am eu holl amser, ymdrechion ac ymddiriedaeth wrth weithio gyda thîm Gwasanaethau Masnachol DHCW i sicrhau canlyniad o safon fyd-eang.”

Cynhelir seremoni Gwobrau GO Cymru ar 8 Tachwedd yng Nghaerdydd.