Cleifion ifanc i elwa o ragnodi electronig yn Ysbyty Arch Noa i Blant Cymru

25 Mehefin 2026

Mae Bwrdd Iechyd Prifysgol Caerdydd a'r Fro wedi cyrraedd carreg filltir bwysig gyda gweithredu rhagnodi a gweinyddu meddyginiaethau electronig yn llwyddiannus ar draws Ysbyty Arch Noa i Blant Cymru.

Digwyddodd y cyflwyniad diweddaraf o'r system Rhagnodi a Gweinyddu Meddyginiaethau electronig (ePMA) gan y cyflenwr, Nervecentre, ym Mwrdd Iechyd Caerdydd a’r Fro ar draws Ysbyty Arch Noa i Blant Cymru, yr Uned Argyfwng Pediatrig ac Uned y Menywod yn Ysbyty Athrofaol Cymru.

Mae'r symudiad i ragnodi a gweinyddu meddyginiaethau electronig yn caniatáu i staff gofal iechyd gael mynediad at siartiau meddyginiaethau digidol, sganio band garddwrn claf i'w adnabod yn gywir, sganio codau bar meddyginiaeth, a chofnodi gweinyddiaeth meddyginiaethau'n ddigidol – a hynny i gyd heb ddefnyddio un ddalen o bapur. Mae'r newid digidol hwn yn gwella gofal cleifion, gan wneud y broses yn haws, yn fwy diogel ac yn fwy effeithlon i gleifion a gweithwyr proffesiynol gofal iechyd.

Dywedodd Daniel Rigler, Ymgynghorydd Pediatreg: "Mae cyflwyno rhagnodi electronig wedi bod yn newid a groesewir i staff ar y wardiau. Ni fydd siartiau yn mynd ar goll na llawysgrifen wael i'w dehongli mwyach! Mae'r manteision enfawr a gafwyd o gefnogaeth rhagnodi electronig, a gweinyddu meddyginiaethau'n fwy diogel wedi helpu i foderneiddio'r gofal a ddarparwn."

Dywedodd Hannah Wilce, Rheolwr Prosiect ePMA: “Mae’r gweithrediad hwn yn nodi carreg filltir bwysig i Gaerdydd a’r Fro, gydag ePMA bellach wedi’i ymgorffori’n llawn mewn ymarfer clinigol ar draws ein lleoliadau cleifion mewnol. Mae eisoes yn trawsnewid sut rydym yn darparu gofal cleifion — gan gefnogi triniaeth fwy diogel a mwy effeithiol o'r eiliad y mae cleifion yn dod i mewn i'n gwasanaethau hyd at eu rhyddhau.

“Mae’r cyflawniad hwn yn dyst gwirioneddol i ymroddiad, gwaith tîm a phenderfyniad eithriadol pawb a oedd yn rhan ohono. Mae cyflawni trawsnewidiad mor gymhleth mewn dim ond wyth mis yn gamp anhygoel, ac un y dylai'r tîm fod yn hynod falch ohoni. Mae arbenigedd a phartneriaeth cydweithwyr yn IGDC a Nervecentre hefyd wedi bod yn hanfodol i’n helpu i gyrraedd y pwynt hwn a gwireddu’r llwyddiant hwn.”

Ymwelodd Ffion Thomas, Uwch Wybodegydd Clinigol (Nyrs Feddyginiaethau) yn Iechyd a Gofal Digidol Cymru (IGDC), â'r Uned Argyfwng Pediatrig i arsylwi'r cyfnod mynd yn fyw. Wrth fyfyrio ar y diwrnod, dywedodd Ffion: “Roedd yn ardderchog gweld yr Uned Argyfwng Pediatrig mynd yn fyw gydag ePMA, gan y bydd yn golygu trosglwyddo a phontio llyfn i nyrsys sy'n trosglwyddo cleifion o fan hyn i wardiau pediatrig eraill yn yr ysbyty. Mae hefyd yn dod â'r Uned Argyfwng Pediatrig yn unol â'r Adran Argyfwng i oedolion sydd wedi bod yn defnyddio ePMA ers ychydig fisoedd yn llwyddiannus. 

“Fel nyrs bediatrig fy hun, roedd yn bleser siarad â nyrsys ar draws yr ysbyty plant a oedd yn gadarnhaol am y newid ac wedi cyffroi i fod yn defnyddio'r system, gan nodi'r manteision diogelwch cleifion mae’n cynnig.”

Mae'r gweithrediad diweddaraf hwn yn adeiladu ar gyfres o ymgyrchoedd mynd yn fyw llwyddiannus dros y misoedd diwethaf ar draws Bwrdd Iechyd Prifysgol Caerdydd a’r Fro. Mae hyn yn cynnwys ar draws Ysbyty Athrofaol Cymru ym mis Tachwedd, o fewn yr Uned Achosion Brys, Ysbyty Prifysgol Llandochau ym mis Ionawr ac ar draws lleoliadau Iechyd Meddwl ym mis Mawrth.