Offer Trosglwyddo Google: Chwyldro Trosglwyddo Data

26ed Medi 2024

Mae tîm yr Adnodd Data Cenedlaethol (NDR) yn defnyddio Google Transfer Appliance fel prawf o gysyniad i symud llawer iawn o ddata yn ddiogel ac yn effeithlon o storfeydd ar y safle IGDC i'r Google Cloud Platform (GCP). Mae'r prosiect hwn yn cyd-fynd â strategaeth IGDC sy'n amlinellu erbyn 2030 y byddwn wedi symud holl storfeydd data IGDC i'r platfform NDR ac sy’n cefnogi nodau'r NDR i wella rhannu a dadansoddi data.  

Mae llwyddiant y prosiect hwn yn dyst i'r cydweithio agos rhwng tîm yr NDR a Chyfarwyddiaeth Gweithrediadau IGDC.   

Mae Google Transfer Appliance yn ddyfais ddiogel sydd wedi'i chynllunio i drosglwyddo llawer iawn o ddata o ganolfannau data i'r cwmwl. Wedi'i ffurfweddu ymlaen llaw i anghenion penodol, a'i amgryptio, mae'n gweithredu all-lein ar gyfer y diogelwch gorau posibl, gan sicrhau bod trosglwyddo data'n ddiogel i seilwaith Google ar gael o fewn y platfform NDR.  

Mae IGDC wedi cysylltu'r peiriant i’w rwydwaith ac wedi dechrau trosglwyddo copi o'r data. Yna bydd y ddyfais yn cael ei chludo i Google, lle bydd y data'n cael eu trosglwyddo i'r platfform NDR cyn y gellir eu dadgryptio.  

Mae tîm yr NDR yn copïo data o storfeydd cenedlaethol, gan gynnwys WCRS, WRRS, WPRS a'r warws data cenedlaethol i'r platfform NDR. Ar ôl eu trosglwyddo, bydd y data'n cael eu trefnu gan ddefnyddio Google BigQuery, sy'n rhan o'r Platfform Data a Dadansoddeg Cenedlaethol (NDAP).  

Mae'r peiriant yn sicrhau diogelwch data gydag amgryptio a chaledwedd sy'n gwrthsefyll ymyrraeth. Mae'n cael ei gludo'n ddiogel, gan ddiogelu'r data trwy gydol y broses.  

Mae mudo cwmwl yn caniatáu mynediad hawdd at ddata, llifoedd gwaith symlach, a dadansoddiad pwerus gyda Google BigQuery, gan wella effeithlonrwydd a gwneud penderfyniadau.  

Bydd tîm yr NDR yn defnyddio Google Cloud ar gyfer dadansoddi data uwch ac yn sefydlu diweddariadau rheolaidd i gadw data'r cwmwl yn gyfredol, i ddatgloi ei botensial llawn. Mae'r NDR yn cychwyn ar gam 4 y rhaglen. Yn ystod Ch3 bydd tîm yr NDR yn gweithio'n agos gyda phartneriaid iechyd a gofal cymdeithasol i ddatblygu cynllun cyflawni rhaglen dwy flynedd gydag IGDC i amlinellu'r dull gweithredu a'r camau i gyd-fynd â strategaethau trosfwaol.  

Mae hyfforddiant ar gael trwy Google Cloud Skills Boost i unrhyw un a hoffai feithrin sgiliau ar gyfer defnyddio GCP. I gael mynediad at yr hyfforddiant, crëwch gyfrif trwy https://www.cloudskillsboost.google/ gan ddefnyddio eich cyfeiriad e-bost GIG a chysylltwch â stephen.shields@wales.nhs.uk os oes angen mynediad at gredydau arnoch.