GIG75 Kenneth Hindmarch yn rhannu ei stori

I ddathlu 75 mlynedd ers sefydlu'r GIG, byddwn yn rhannu straeon gan ystod amrywiol o weithwyr a phroffesiynau ar draws Iechyd Gofal Digidol Cymru Cymru. Heddiw cawn glywed gan Kenneth Hindmarch, Prif Ddatblygwr Meddalwedd.

Dywedwch ychydig wrthym am rôl eich swydd

Fel Prif Ddatblygwr Meddalwedd, rwy’n arwain tîm o ddatblygwyr dawnus sy’n cynnal ac yn datblygu’r system TG genedlaethol sy’n cofnodi rhyngweithio cleifion ag ysbytai a lleoliadau gofal ar draws GIG Cymru. 

Fe’i gelwir yn system Gweinyddu Cleifion Cymru ac rwy’n falch o fod mewn sefyllfa i sicrhau ei bod yn cael ei chynnal a’i datblygu i safon uchel i sicrhau ei bod yn rhoi cymaint o werth â phosibl i’r GIG.

O fewn y tîm rydym yn gweithio gan ddefnyddio dull Agile sy'n annog diwylliant cydweithredol gyda ffocws ar welliant parhaus. Fel system genedlaethol rydym yn cael rhyngweithio â staff y GIG ledled y wlad ar bob lefel.

Beth ydych chi'n ei fwynhau am eich rôl?

Fel datblygwr, mae gan fy rôl agweddau creadigol a thechnegol sy'n herio ac yn annog datblygiad fy sgiliau yn barhaus.

Fel rheolwr, rydw i'n cael y cyfle i fod yn weithgar wrth wella'r gwasanaeth rydyn ni'n ei ddarparu a hefyd arwain y tîm i herio eu hunain a datblygu eu set sgiliau eu hunain a chael eu gweld yn datblygu. Mae diwylliant y GIG yn canolbwyntio ar bobl, trwy wella gofal cleifion ond hefyd drwy gefnogi gweithwyr o fewn y sefydliad sy'n gwneud y GIG yn lle gwych i weithio.

Sut wnaethoch chi ymuno â'ch proffesiwn?

Pan aned ein merch Ffion roeddwn wedi fy syfrdanu gan ba mor anhygoel yw’r staff yn ysbyty Glangwili a phenderfynais bryd hynny fy mod am roi yn ôl i’r GIG mewn unrhyw ffordd y gallwn.

Chwiliais ar wefan swyddi’r GIG am unrhyw swydd a oedd ar gael a dod o hyd i swydd Datblygwr Iau a gwneud cais. Roedd gen i ddiddordeb byw mewn TG ond ar y pryd doedd gen i ddim profiad o ddatblygu meddalwedd felly doeddwn i ddim yn disgwyl clywed yn ôl. Yn ffodus fe wnes i, a cheisiais ddysgu cymaint ag y gallwn yn y pythefnos cyn y cyfweliad.

Diolch byth, rhoddodd y tîm gyfle i mi fod yn ddatblygwr dan hyfforddiant. Ers ymuno â’r GIG rwyf wedi cael cymorth ardderchog i ddysgu a symud ymlaen o ddatblygwr dan hyfforddiant i ddatblygwr iau ac yna uwch ddatblygwr i fy swydd bresennol fel prif ddatblygwr. Rydw i’n arwain a mentora fy nhîm fy hun gyda'r gobaith y gallant ddatblygu fel y gwnes i.

Pa mor hir ydych chi wedi bod yn rhan o'r GIG?

Bron i 9 mlynedd, ymunais ym mis Rhagfyr 2014

Beth mae'r GIG yn ei olygu i chi?

Rwy’n hynod falch o weithio i’r GIG, i wneud yr hyn a allaf i helpu i gefnogi’r staff gwych sy’n gweithio ynddo ond hefyd i helpu i ddarparu’r gofal gorau posibl i’r cleifion ar yr adeg y mae ei angen arnynt.

Rwyf hefyd yn ddiolchgar iawn fy mod wedi cael y cyfle i ymuno â'r GIG i ddatblygu'n unigol a symud ymlaen yn fy ngyrfa.  Mae'n lle gwych i weithio sy'n rhoi ymdeimlad gwirioneddol o bwrpas a boddhad swydd aruthrol.