Neidio i'r prif gynnwy

System Imiwneiddio Cymru wedi cyrraedd rownd derfynol Impact Awards

17 Chwefror 2022

Mae System Imiwneiddio Cymru (WIS) wedi cyrraedd rhestr fer Gwobr Arweinwyr Digidol Impact Awards 2022. Mae'r gwobrau'n ddathliad o dechnoleg er gwell y DU. Mae Iechyd a Gofal Digidol Cymru yn un o dri sydd wedi cyrraedd y rownd derfynol yn y categori Arloesedd yn ystod y Pandemig am y WIS, sy'n darparu'r gwaith o reoli, dosbarthu ac adrodd ar gyfer rhaglen frechu COVID-19 yng Nghymru.  

Gwnaeth y datrysiad digidol, a ddatblygwyd gan dîm Iechyd a Gofal Digidol Cymru i gefnogi’r rhaglen frechu lwyddiannus, argraff fawr ar y panel beirniadu a fydd yn gwneud penderfyniad terfynol ar y wobr yn y seremoni ar 10 Mawrth.

Cymru yw'r unig ran o'r DU i ddatblygu datrysiad rheoli brechlyn digidol gan ddefnyddio tîm meddalwedd mewnol sy'n bodoli eisoes. Mae WIS yn olrhain stoc y brechlyn, yn creu slotiau apwyntiad, yn anfon llythyrau apwyntiad, ac yn cofnodi manylion am bob brechlyn a roddir.

Canmolwyd y system gan Brif Swyddog Gweithredu Rhaglen Frechu Cymru, Jeremy Griffith,
"Ar ôl siarad â chydweithwyr yn y DU, UDA, Ffrainc, Seland Newydd ac Awstralia – maent i gyd wedi rhyfeddu at yr hyn y gall WIS ei wneud. Mae wedi bod yn sylfaen i ddarparu un o'r rhaglenni brechu cyflymaf a gorau yn y byd i gyd. Nid yn unig mae’r tȋm wedi adeiladu system dda ond mae wedi addasu'r system ar fyr rybudd - pan fu'r amser rhwng gwneud penderfyniad a rhoi’r penderfyniad ar waith yn oriau a dyddiau."

Bydd gwobr gyffredinol Dewis y Bobl hefyd yn cael ei chyhoeddi yn y seremoni wobrwyo fis nesaf, a bydd pleidlais gyhoeddus ar gyfer hyn ar agor tan 9  Mawrth.