Mae system frechu yn rhyddhau amser ar gyfer mwy o ryngweithio â chleifion
Mae'r system a ddefnyddir i gofnodi a gweinyddu'r broses frechu yng Nghymru ar gyfer salwch gan gynnwys Covid-19 a'r ffliw, wedi'i huwchraddio.
Mae System Imiwneiddio Cymru (WIS) bellach yn cydymffurfio â safonau data iechyd HL7 FHIR. Gall gyhoeddi APIs diogel, a chyflwyno data i'r Adnodd Data Cenedlaethol (NDR) a'r Ystorfa Data Clinigol (CDR), gan ei alluogi i fod yn rhyngweithredol â systemau clinigol eraill.
Dywedodd Joshua Hunt, Pennaeth Cyflenwi Ystwyth (Iechyd Cymunedol ac Iechyd Meddwl) yn IGDC: “Am y tro cyntaf, gall brechwyr roi brechiadau’r Ffliw a COVID-19 ar y cyd mewn dyluniad newydd sy’n canolbwyntio ar y defnyddiwr ac sy’n lleihau cliciau, yn gwella trwybwn, ac yn rhyddhau amser ar gyfer rhyngweithio ystyrlon â chleifion. Mae hyn yn gwneud pob cyswllt yn y clinig yn fwy gwerthfawr.”
Mae WIS yn dod â gallu o'r dechrau i'r diwedd ar gyfer brechiadau Ffliw a COVID-19, o archebu a rheoli stoc hyd at gofnodi ar bwynt gofal a gwyliadwriaeth ar draws y system. Bydd y nodweddion archebu a chyfathrebu yn dilyn yn y misoedd nesaf ar gyfer brechiadau RSV (Feirws Syncytiol Anadlol).
Y tymor hwn, bydd pob brechwr yng Nghymru, mewn meddygfeydd teulu, fferyllfeydd cymunedol a chanolfannau brechu byrddau iechyd, yn defnyddio WIS.
Mae'r WIS wedi'i uwchraddio yn integreiddio data demograffig amser real â data gofal sylfaenol ar gyflyrau risg i greu golwg ddiogel a chenedlaethol o gymhwysedd ledled Cymru.
Mae nodwedd 'argymhelliad brechu' newydd yn tynnu sylw at frechlynnau eraill y gallai fod yn ddyledus i rywun eu cael ac yn croesgyfeirio â'r stoc sydd ar gael. Mae hyn yn caniatáu i frechwyr roi brechlynnau ychwanegol ar y diwrnod, gan leihau'r angen i deithio ymhellach, neu i archebu apwyntiadau ar gyfer y dyfodol.
Mae lefelau uchel o awtomeiddio meddalwedd yn trosi data yn uniongyrchol i lif gwaith ar gyfer brechwyr trwy:
- drefnu clinigau ar gyfer grwpiau cymwys
- anfon gwahoddiadau a negeseuon atgoffa
- darparu adroddiadau bron mewn amser real ar stoc, enwaduron, apwyntiadau a drefnwyd, apwyntiadau a fynychwyd, apwyntiadau a fethwyd, a brechiadau a ddarparwyd
Mae hyn yn lleihau'r ymdrech weinyddol i glinigau, yn cyflymu adrodd ar ymgyrchoedd, ac yn helpu i sicrhau y cysylltir â’r bobl gywir ar yr amser cywir.
Dywedodd Joshua Hunt: “Mae WIS 2.0 yn rhoi system imiwneiddio fodern, sengl i Gymru y gall timau ymddiried ynddi wrth y pwynt gofal ac ar raddfa genedlaethol. Mae wedi'i adeiladu o amgylch safonau cydnabyddedig, data amser real a llifoedd gwaith ymarferol, fel y gall clinigwyr dreulio mwy o amser gyda phobl a llai o amser yn brwydro â systemau.”