Mae pob gweithiwr gofal iechyd proffesiynol yn elwa o system Siart Twf Pediatrig Digidol Cymru newydd
15 Rhagfyr 2025
Mae Siart Twf Digidol Cymru yn trawsnewid y ffordd rydym yn monitro twf plant ledled Cymru.
Wedi'i ddatblygu gan Iechyd a Gofal Digidol Cymru (IGDC) gyda Choleg Brenhinol Pediatreg ac Iechyd Plant ynghyd â thîm amlddisgyblaethol o glinigwyr yng Nghymru, mae'r system hon yn caniatáu i glinigwyr gofnodi, storio ac adolygu data twf hanfodol gan gynnwys taldra, pwysau a chylchedd y pen, trwy Borth Clinigol Cymru.
Mae ysbytai ledled Cymru yn newid o siartiau twf papur traddodiadol i ddatrysiad digidol unedig sydd ar gael ar draws y daith iechyd plant. Mae'r datblygiad hwn yn golygu y gall clinigwyr nawr gael mynediad at dueddiadau twf cywir a chyfoes yn gyflym ac yn ddiogel, gan eu galluogi i nodi pryderon iechyd posibl yn gynharach.
Bydd system Siart Twf Digidol Cymru ar gael i dros 40,000 o weithwyr gofal iechyd proffesiynol ledled Cymru, drwy Borth Clinigol Cymru (WCP). Gan ddefnyddio un dull mewngofnodi'n unig, gall gweithwyr proffesiynol nadex Cymru gael mynediad at ddata cynhwysfawr am gleifion o sawl ffynhonnell, i gyd mewn un lle. Mae monitro twf plentyn yn hanfodol ar gyfer canfod problemau iechyd a chefnogi ymyrraeth gynnar. Yn flaenorol, roedd data twf yn aml yn cael ei gofnodi ar siartiau neu systemau ar wahân gan wahanol weithwyr proffesiynol, gan arwain at gofnodion tameidiog a gwybodaeth goll. Mae Siart Twf Digidol Cymru yn mynd i'r afael â hyn drwy gydgrynhoi popeth i mewn i un platfform unedig, hygyrch.
Dywedodd Dr. David Tuthill, Pediatregydd Ymgynghorol ym Mwrdd Iechyd Prifysgol Caerdydd a'r Fro: “Bydd Siart Twf Digidol Cymru yn trawsnewid sut rydym yn olrhain ac yn rhannu mesurau twf pediatrig ar draws ffiniau byrddau iechyd. Mae'n gam sylweddol tuag at ein nod hirdymor o gael mynediad unedig at ddata twf ar draws systemau a gwasanaethau GIG Cymru.”
Dywedodd Rhidian Hurle, Cyfarwyddwr Meddygol yn IGDC: “Gyda chyflwyniad y system Siart Twf Digidol, rydym yn newid y ffordd y mae data twf pediatrig yn cael ei rannu ledled Cymru ac yn cael effaith gadarnhaol wirioneddol ar iechyd plant yn GIG Cymru.”