IGDC yn noddi Nyrs y Flwyddyn Coleg Nyrsio Brenhinol Cymru 2025

09 Rhagfyr 2025 

Roedd yn bleser gan Iechyd a Gofal Digidol Cymru (IGDC) noddi un o'r gwobrau yng Ngwobrau Nyrs y Flwyddyn Coleg Nyrsio Brenhinol Cymru 2025 eleni.   Mae'r gwobrau, a gynhelir ym mis Tachwedd, yn ddathliad blynyddol sy'n anrhydeddu nyrsys ledled Cymru sy'n mynd yr ail filltir i wella gofal cleifion a datblygu'r proffesiwn.

Enillwyd Gwobr Ymchwil, Arloesi a Digideiddio mewn Nyrsio gan Victoria Hayman-Teear, uwch-nyrs ym Mwrdd Iechyd Prifysgol Caerdydd a'r Fro. 

Mae'r wobr hon yn ceisio cydnabod a gwobrwyo rhagoriaeth mewn nyrsio a bydwreigiaeth lle mae ymchwil, arloesedd neu ddigideiddio (gan gynnwys gwaith rhagarweiniol fel astudiaethau peilot, archwiliadau clinigol, neu wella gwasanaethau) wedi dangos manteision pendant i ofal cleifion. Mae'n cydnabod nyrsys a bydwragedd sydd wedi gwella profiad y claf drwy eu harloesiadau sy'n seiliedig ar dystiolaeth sydd wedi sbarduno a/neu ddylanwadu ar newid.

Dywedodd Victoria: “Mae’n anrhydedd wirioneddol i mi dderbyn y wobr hon. Nid yw nyrsio digidol yn ymwneud â theclynnau na systemau; mae'n ymwneud â darparu gofal gwell, mwy diogel a mwy cysylltiedig i gleifion, yn ogystal â chefnogi ein gweithlu i ffynnu.

“Dim ond oherwydd y timau anhygoel rwy'n gweithio ochr yn ochr â nhw bob dydd y mae'r prosiectau sy'n cael eu cydnabod, fel ein gwaith ar Healthy.io a'r ANCLE Café, yn bosibl. Rwy'n ddiolchgar i IGDC am noddi'r categori hwn ac am hyrwyddo arloesedd digidol mewn gofal cymunedol.”

Wrth gyflwyno’r wobr, dywedodd Frances Beadle, Prif Swyddog Gwybodaeth Nyrsio yn IGDC: “Mae arloesedd mewn nyrsio wrth wraidd yr hyn a wnawn yn IGDC. Mae noddi’r wobr hon yn ein galluogi i ddathlu’r rhai sy’n llywio newid digidol ar y rheng flaen, gan sicrhau bod cleifion yn derbyn y gofal gorau posibl drwy systemau mwy cysylltiedig a mwy clyfar.”

Daeth y seremoni â gweithwyr proffesiynol nyrsio o bob rhan o iechyd a gofal cymdeithasol yng Nghymru ynghyd, gan gydnabod cyflawniadau mewn addysg, ymchwil a gofal sy'n canolbwyntio ar y claf. Roedd yr enillwyr yn cynnwys nyrsys mewn meysydd fel digideiddio gofal clwyfau a hyfforddiant strwythuredig ar gyfer timau nyrsio cymunedol.

Mae'r nawdd yn adlewyrchu ymrwymiad IGDC i gefnogi arloesedd a chydweithio ar draws GIG Cymru. Fel sefydliad sy'n grymuso nyrsys gydag offer sy'n gwella effeithlonrwydd, yn lleihau dyblygu, ac yn gwella diogelwch cleifion, mae hyn yn cyd-fynd yn berffaith ag ethos Gwobrau Nyrs y Flwyddyn Coleg Nyrsio Brenhinol Cymru.

Ychwanegodd Helen Whyley, Cyfarwyddwr Gweithredol, Coleg Nyrsio Brenhinol Cymru: “Galluogodd y gefnogaeth gan IGDC ni i wneud y digwyddiad mawreddog hwn yn llwyddiant ysgubol, gan ddangos pa mor werthfawr yw nyrsys, bydwragedd, myfyrwyr a gweithwyr cymorth gofal iechyd yng Nghymru.”

“Rwyf wrth fy modd bod IGDC wedi gallu noddi Gwobrau Nyrs y Flwyddyn Coleg Nyrsio Brenhinol Cymru eleni. Tynnodd y gwobrau hyn sylw at sut mae technoleg, ymchwil a digidol yn newid gofal iechyd yng Nghymru. Drwy ddefnyddio offer digidol, rydym yn gwella gofal cleifion ac yn helpu nyrsys y GIG i ddarparu gofal mwy diogel, mwy craff a mwy cydlynol. Llongyfarchiadau i'r holl enwebeion ac enillwyr.”