Negeseuon y gall practisiau eu haddasu

Cyflwyniad 

Mae negeseuon y gall practisiau eu haddasu yn negeseuon byr, wedi’u teilwra o’ch practis meddyg teulu i’ch cleifion. 

Mae’r negeseuon yn ymddangos mewn mannau allweddol yn y daith wrth i’ch cleifion ddefnyddio’r ap ac maen nhw’n benodol i dasg neu ddiben y dudalen y maen nhw’n ymddangos arni. 

Er bod modd eu haddasu, mae’n bwysig bod eich practis yn cadw at egwyddorion y canllaw arddull hwn. Mae hyn yn helpu i sicrhau bod negeseuon eich practis yn cyd-fynd ag egwyddorion GIG Cymru, a bod cleifion ledled Cymru yn cael profiad cyson. 

Arfer gorau ar gyfer ysgrifennu iechyd a Saesneg/Cymraeg clir 

• Osgoi jargon meddygol – gweler y canllaw A to Z of NHS health writing 
• Defnyddiwch Saesneg clir/Cymraeg clir a dilëwch eiriau diangen – hyd yn oed geiriau cwrteisi fel ‘os gwelwch yn dda’ a ‘diolch’; mae angen i’r testun fod yn fyr ac i’r pwynt 
• Yn Saesneg, gallwch ddefnyddio cywasgiadau fel “you’re” neu “you’ll” – ond dylech osgoi cywasgiadau negyddol fel “can’t” neu “don’t”. Defnyddiwch “cannot” a “do not”. Mae ymchwil yn dangos y gall cywasgiadau ddrysu rhai defnyddwyr. 
• Cadwch at un pwynt i bob neges - bydd gormod o bwyntiau neu alwadau i weithredu yn ddryslyd ac efallai y bydd y defnyddiwr yn camddeall 
• Peidiwch ag ysgrifennu mewn LLYTHRENNAU BRAS – gall hyn fod yn frawychus neu’n annymunol 
• Peidiwch â chynnwys enwau personau cyswllt 
• Peidiwch â chynnwys nifer o bwyntiau cyswllt o fewn neges; gall hyn ddrysu’r darllenydd 
• Peidiwch ag ysgrifennu mewn html 

Llais a thôn 

Er bod yn rhaid cadw negeseuon o fewn yr ap yn fyr, cofiwch bod yn rhaid i’ch negeseuon fod yn broffesiynol ac yn gyson â llais a thôn GIG Cymru. 

Mae ein llais yn niwtral ac yn ffeithiol. Mae’n awdurdodol, ond hefyd yn dawel ac yn galonogol. Mae’n grymuso, nid yn nawddoglyd, ac yn bersonol, nid yn ffurfiol. Rydym yn: 

• cyfarch y defnyddiwr yn uniongyrchol 
• tawelu meddwl trwy ddweud pethau fel “Gall Sertraline achosi sgîl-effeithiau, ond mae llawer o bobl yn cael dim sgîl-effeithiau neu rai mân yn unig” 
• grymuso trwy ddweud pethau fel “siaradwch â’ch meddyg am ...” yn hytrach na “bydd eich meddyg yn dweud wrthych am...” 
• osgoi defnyddio berfau fel “dylech” gan y gall hyn swnio’n nawddoglyd 

Negeseuon sy’n benodol i’r dudalen 

Gwneud apwyntiad meddyg teulu 

Archebu presgripsiwn rheolaidd 

Neges groeso Fy Iechyd Ar-lein 

Pan fydd eich practis meddyg teulu wedi’i gysylltu â’r ap, gallwch annog eich cleifion sydd â chyfrifon Fy Iechyd Ar-lein i symud i’r ap trwy ddiweddaru eich neges groeso Fy Iechyd Ar-lein.  

Uchafswm nifer y nodau a awgrymir: 750 nod (Cymraeg a Saesneg gyda’i gilydd) 
  
Nodiadau arddull/cynnwys:  
Cynhwyswch ddolen ar gyfer apiau eraill fel eConsult, os yw’n berthnasol .
  
Neges sampl:  
Rydym yn falch o gyhoeddi y gallwch nawr gael mynediad at wasanaethau iechyd o [enw eich practis] ar ap newydd GIG Cymru.  

Gallwch ddefnyddio’r ap i gael mynediad at wasanaethau GIG Cymru fel cyngor iechyd GIG 111 Cymru a rhoi gwaed ac organau. 

Gall cleifion cymwys bellach hefyd ddefnyddio’r ap i wneud y canlynol yn ddiogel ac yn hawdd:  

• trefnu apwyntiadau arferol  

• archebu presgripsiynau rheolaidd  

I gael mynediad at wasanaethau practis meddyg teulu ar-lein drwy’r ap, rhaid bod gennych chi NHS login wedi’i ddilysu’n llawn, neu ID llun dilys i greu un. 

Y tro cyntaf y byddwch chi’n mynd i’r ap, bydd gofyn i chi nodi cod post eich practis meddyg teulu. Rhowch y cod post [cod post eich practis] a dewiswch y practis hwn i barhau.  

• Help gyda Chwiliad Meddyg Teulu 
• Help gyda NHS login 

Gallwch hefyd gysylltu â’ch meddyg teulu ar-lein gyda ffurflen eConsult [CYNNWYS DOLEN]. Mae hyn yn ein helpu i frysbennu eich cais a threfnu apwyntiadau yn unol â’r brys. 

I lawrlwytho Ap GIG Cymru i’ch dyfais, chwiliwch am “Ap GIG Cymru”/“NHS Wales App” yn Google Play neu’r Apple App Store.