Darparu gwasanaethau digidol o’r radd flaenaf, gan rymuso pobl i fyw bywydau iachach.
Gwneud digidol yn rym er gwell ym maes iechyd a gofal.
Sefydlwyd Iechyd a Gofal Digidol Cymru fel Awdurdod Iechyd Arbennig ar 1 Ebrill 2021, dan gyfarwyddyd Llywodraeth Cymru i:
Cyflawnir ein diben drwy ein cenadaethau a’n hamcanion strategol. Gwireddir ein gweledigaeth drwy ein hegwyddorion strategol:
Mae ein gwasanaethau yn galluogi staff iechyd a gofal i gyrchu’r wybodaeth sydd ei hangen arnynt i wneud penderfyniadau am iechyd a gofal, ac i gofnodi’r camau a gymerwyd ganddynt. Rydym yn croesawu dull dylunio sy'n canolbwyntio ar y defnyddiwr i ddatblygu cymwysiadau digidol gyda staff iechyd a gofal, gan flaenoriaethu deall sut y bydd ein systemau'n cael eu defnyddio.
Er mwyn gallu gwneud mwy, mae angen bod yn fwy cynhyrchiol fel sefydliad. Gellir gwneud hyn drwy fireinio’r ffordd rydym yn gweithio, gan ganolbwyntio llai ar waith pwrpasol, a mwy ar gydrannau y gellir eu hailddefnyddio. Mae gan safonau a rheolau rôl bwysig i'w chwarae hefyd. Mae safonau data yn helpu i symleiddio ein cynnyrch a'n gwasanaethau. Yn yr un modd, mae safonau rheoli rhaglenni a phortffolio yn helpu i symleiddio'r ffordd rydym yn rhedeg ein portffolios, rhaglenni a phrosiectau.
Mae’r GIG yng Nghymru ar drobwynt. Mae'r heriau rydym yn eu hwynebu yn gymhleth ac yn newid yn barhaus; gwella iechyd a lleihau anghydraddoldebau yn erbyn cefndir o effeithiau parhaus pandemig COVID-19 a chyllid cyfyngedig. Ond mae'r cyfle i drawsnewid iechyd a gofal yn arwyddocaol, ac mae digidol a data yn chwarae rhan hanfodol wrth gyflawni hyn, ond mae'n dod â chost uwch, felly rydym yn archwilio ffyrdd o ddod yn fwy cynaliadwy yn ariannol.
Rydym yn cydweithio i ddarparu datrysiadau i'r problemau sydd bwysicaf i'n partneriaid ac yn gweithredu fframwaith rheoli buddion cadarn. Mae hyn yn helpu i wella effeithlonrwydd, gwella profiadau, a darparu mwy o werth i staff, cleifion a'r cyhoedd.
Mae cyflymder newid technolegol yn cyflymu, a rhaid i ni addasu ac ystwytho ein cyfeiriad strategol yn unol â hynny. Mae ein strategaeth yn darparu canllawiau ar gyfer ein cyfeiriad strategol, ond nid yw’n gynllun anhyblyg. Byddwn yn parhau i fonitro a gwerthuso’r dirwedd newidiol, a byddwn yn barod i addasu ein cynlluniau yn ôl yr angen.
Rydym yn trawsnewid ein dull o ddylunio a darparu cynhyrchion a gwasanaethau digidol drwy raglen Adeiladu Ein Dyfodol sydd wedi'i strwythuro o amgylch y pum egwyddor strategol a amlinellwyd uchod. Mae rhagor o wybodaeth am y rhaglen hon ar gael o dan Genhadaeth 5 yn ddiweddarach yn yr adroddiad hwn.
Mae'r holl bethau uchod wedi'u hategu gan ein gwerthoedd o gydweithio, arloesedd, cynhwysiant, rhagoriaeth a thosturi ac wedi'u tanlinellu gan ein hymrwymiad i welliant parhaus trwy alluogwyr a meysydd Dyletswydd Ansawdd.
Mae Iechyd a Gofal Digidol Cymru yn Awdurdod Iechyd Arbennig sydd â rôl unigryw o ran darparu gwasanaethau digidol, data a thechnoleg cenedlaethol i gefnogi darparu iechyd a gofal yng Nghymru.
Mae mwy na hanner ein gweithwyr yn weithwyr technegol, gan gynnwys peirianwyr meddalwedd, dadansoddwyr data a phenseiri digidol. Mae ein Portffolios CTCI yn gymysgedd o weithrediadau a rhaglenni/prosiectau newydd. Mae 80% o'n hadnoddau wedi'u hymrwymo i wasanaethau gweithredol. Mae'r rhaniad hwn yn amrywio fesul Portffolio. Mae gan ein gwaith effaith amlwg, fel y gwelir drwy'r mwy na 100 o wasanaethau gweithredol a ddefnyddir bob dydd gan ein partneriaid.
Un o'r heriau allweddol y mae GIG Cymru yn parhau i'w hwynebu yw data iechyd a gofal dameidiog. Mae Llywodraeth Cymru yn cydnabod yr angen i ddefnyddio data yn well, fodd bynnag, mae diffyg data a safonau technegol yn rhwystr i rannu data.
Wedi'i sefydlu at ddiben helpu a chefnogi darpariaeth iechyd a gofal cymdeithasol digidol trwy dechnoleg ddigidol, data a safonau, mae IGDC yn sefydlu saernïaeth agored trwy blatfform data Cymru gyfan, gan weithio gyda chydweithwyr GIG Cymru a phartneriaid yn y sector preifat i ddefnyddio safonau rhyngweithredu i rannu data yn ddiogel ac yn saff.
Rydym yn casglu data o ddigwyddiadau gofal drwy adeiladu a phrynu'r systemau a ddefnyddir yn GIG Cymru ar gyfer darparu iechyd a gofal. Mae ein rôl yn cynnwys arwain gwasanaethau masnachol, caffael, rheoli rhaglenni/prosiectau a newid busnes i hwyluso casglu data. Er mwyn sicrhau bod yr holl ddata a gesglir yn strwythuredig ac yn ystyrlon, rydym yn datblygu, yn cefnogi ac yn hyrwyddo defnyddio safonau gwybodaeth.
Oni bai ei fod yn cael ei ddiogelu a'i storio mewn amgylchedd sefydlog, mae casglu'r data hwn yn dod yn wrthgynhyrchiol. Dyna pam rydyn ni'n darparu'r seilwaith ar gyfer storio data iechyd a gofal yn ddiogel, gan gynnwys canolfannau data, gwasanaethau Cwmwl a seiberddiogelwch.
Bydd yr Adnodd Data Cenedlaethol a'r Saernïaeth Darged Genedlaethol yn cynorthwyo trawsnewid iechyd a gofal cymdeithasol yng Nghymru trwy ddefnydd cysylltiedig a chydweithredol o ddata, gyda chefnogaeth ein Fframwaith Llywodraethu Gwybodaeth, i alluogi rhannu data a lleihau gweithio ar wahân.
Mae'r gwaith pwysig hwn yn cefnogi nod Llywodraeth Cymru o ddarparu gwasanaethau iechyd a gofal di-dor sy'n cynnig mynediad cyflym a chyfartal at ofal i bob dinesydd.
Darparu gwasanaeth cymorth cyfrifiaduron wedi’i reoli’n llawn i 17,000 o ddefnyddwyr ar draws GIG Cymru, gan gynnwys Practisiau Meddygon Teulu a sefydliadau cenedlaethol.
Arwain datblygiad achosion busnes cenedlaethol, gan gynnwys fframweithiau buddion ar gyfer mentrau digidol cenedlaethol newydd.
Rheoli tenantiaeth Microsoft 365 ar gyfer 120,000 o ddefnyddwyr yn GIG Cymru.
Arwain datblygiad proffesiynol y gweithlu digidol ar gyfer GIG Cymru.
Cynghori Llywodraeth Cymru a sefydliadau partner ar y cyfeiriad strategol ar gyfer gwasanaethau iechyd a gofal digidol, gan gefnogi canfyddiadau adolygiad Llywodraethu Digidol 2024.
Gwyliwch arddangosfa o'n gwaith: DHCW – Arddangosfa o'n gwaith IGDC – Arddangosiad o’n gwaith
Nid yw hi erioed wedi bod yn fwy amlwg bod angen chwyldro digidol a data wrth ddarparu iechyd a gofal. Sicrhau canlyniadau gwell mewn gwasanaethau iechyd a gofal diogel ac ymatebol yw’r nodau rydym yn ceisio eu cyflawni. Mae digidol a data yn alluogwyr allweddol ar gyfer hyn, yn awr ac yn y dyfodol.
Mae ein strategaeth wedi’i fframio o amgylch yr un pum cenhadaeth â’n Cynllun Tymor Canolig Integredig tair blynedd, a’n Cynllun Busnes blynyddol.
Mae ein Cenadaethau yn dwyn ynghyd y portffolios gwaith a’r swyddogaethau galluogi yn ein sefydliad. Mae pedair o’r Cenadaethau yn canolbwyntio ar gyflawniad, gan ddisgrifio sut mae mabwysiadu ac esblygiad cynhyrchion digidol a data yn ysgogi gwell gwerth a chanlyniadau i staff iechyd a gofal, cleifion a’r cyhoedd.
Mae’r bumed Genhadaeth yn canolbwyntio ar sut yr ydym yn gweithredu, gan gynnwys ein gallu i weithredu o fewn ein cyllid dyranedig, i gynnal gweithlu arbenigol, brwdfrydig, ac i gyflawni ein rhwymedigaethau o ran ansawdd a diogelwch, llywodraethu a chynaliadwyedd.
Gyda phedair blynedd o weithredu fel Awdurdod Iechyd Arbennig (AIA), mae IGDC yn parhau i symud ymlaen a datblygu ein rôl arweinyddiaeth ddigidol mewn seiber, llywodraethu gwybodaeth, safonau data a datblygiad y proffesiwn digidol a thechnoleg yn GIG Cymru.
Gyda gweithlu o 1,235 o gyfwerth ag amser cyflawn (WTE) ar gyfartaledd yn 2024–25 a chyfanswm cyllid (refeniw a chyfalaf) o £196.48m, rydym yn gweithio gyda mwy na 100 o wasanaethau, technolegau a gwybodaeth ddigidol gwydn.
Rydym wedi cyflawni 90% o'n Cynllun Busnes Blynyddol eleni ac mae ein Grŵp Adolygu a Dysgu Digwyddiadau yn parhau i asesu cyfleoedd i ddysgu o feysydd fel rhaglenni, archwiliadau a digwyddiadau. Caiff dysgu ei asesu drwy’r Fframwaith Ffactorau Cyfrannol a’i ymgorffori drwy broses o wella parhaus sy’n cyd-fynd â’r Ddyletswydd Ansawdd. Drwy ein rhaglen Adeiladu Ein Dyfodol, rydym hefyd wedi datblygu dull gwella ansawdd ar draws y sefydliad.
Mae amodau atebolrwydd IGDC, a osodwyd gan Lywodraeth Cymru, yn canolbwyntio ar feysydd allweddol y sefydliad ac yn aml maent yn cyd-fynd â blaenoriaethau'r Cabinet ar y pryd. Gosodwyd cyfanswm o 17 o amodau atebolrwydd ar IGDC ar gyfer y flwyddyn ariannol 2024/25. Roedd y rhain yn ymwneud â chyflawni rhaglenni cenedlaethol a rheoli rhanddeiliaid. Erbyn diwedd y flwyddyn ariannol, roedd yr holl amodau atebolrwydd wedi'u cwblhau neu eu cyflawni, fodd bynnag, codwyd ein statws uwchgyfeirio ym mis Mawrth 2025 i lefel 3 (monitro uwch) ar gyfer cyflawni rhaglenni mawr.