Adroddiad ar Dâl a Staff

Mae’r wybodaeth yn yr adroddiad hwn yn ymwneud â thâl yr uwch-reolwyr a gyflogir gan Iechyd a Gofal Digidol Cymru (IGDC). Y diffiniad o “Uwch Reolwr” yw: ‘yr unigolion hynny mewn swyddi uwch sydd ag awdurdod neu gyfrifoldeb dros gyfarwyddo neu reoli prif weithgareddau corff y GIG. Mae hyn yn golygu'r rhai sy'n dylanwadu ar benderfyniadau'r endid yn ei gyfanrwydd yn hytrach na phenderfyniadau cyfarwyddiaethau neu adrannau unigol.’ O ran IGDC, ystyrir mai’r uwch-reolwyr yw mynychwyr rheolaidd cyfarfodydd y Bwrdd, h.y. Aelodau o'r Tîm Gweithredol a'r Aelodau Annibynnol.

Mae trefniadau cyflog presennol y sector cyhoeddus yn gymwys i bob aelod o staff gan gynnwys y Tîm Gweithredol.

Mae pob aelod o’r Tîm Gweithredol ar bwyntiau cyflog yn hytrach na graddfeydd cyflog.

Mae perfformiad aelodau’r Tîm Gweithredol yn cael ei asesu yn erbyn amcanion personol ac yn erbyn perfformiad cyffredinol yr Awdurdod Iechyd Arbennig. Nid yw’r Awdurdod Iechyd Arbennig yn gweithredu cynllun tâl sy’n gysylltiedig â pherfformiad.

Bu rhai taliadau i gyn-Weithredwyr neu gyn-uwch-reolwyr eraill yn ystod y flwyddyn a manylir arnynt yn y tabl isod.

Gall y cyfansymiau yn rhai o'r tablau canlynol wahaniaethu oddi wrth y rhai yn y Cyfrifon Blynyddol gan eu bod yn cynrychioli staff mewn swydd ar 31 Mawrth 2025 tra bod y Cyfrifon Blynyddol (nodyn 9.2) yn dangos cyfartaledd nifer y gweithwyr yn ystod y flwyddyn.

Tryloywder tâl uwch-reolwyr yn y sector cyhoeddus datganoledig yng Nghymru – Canllaw ar Drechu Arferion Cyflogaeth Annheg a Hunangyflogaeth Ffug

Tablau datgelu cyflogau a phensiynau (heb eu harchwilio) – ffigur cyfanswm sengl o daliadau

Mae’r Adroddiad Tâl hwn yn cynnwys ffigur cyfanswm sengl o daliadau. Mae swm y buddiannau pensiwn ar gyfer y flwyddyn sy'n cyfrannu at y ffigur cyfanswm sengl yn cael ei gyfrifo yn ôl canllawiau Asiantaeth Pensiynau Awdurdod Gwasanaethau Busnes y GIG.

Mae’r swm a gynhwysir yn y tabl ar gyfer buddiannau pensiwn yn seiliedig ar y cynnydd mewn pensiwn cronedig wedi’i addasu am chwyddiant. Yn gyffredinol, bydd hyn yn ystyried blwyddyn ychwanegol o wasanaeth ynghyd ag unrhyw newidiadau mewn cyflog pensiynadwy. Nid yw hyn yn swm a dalwyd i unigolyn gan IGDC yn ystod y flwyddyn; mae’n gyfrifiad yn seiliedig ar y tabl buddiannau pensiwn. Gall ffigurau gael eu dylanwadu gan ffactorau fel newidiadau cyflog, cyfraniadau ychwanegol i’r cynllun pensiwn, ac effeithiau prisio eraill ar y cynllun pensiwn cyfan.

Mae datgelu cyflog a phensiwn yn adlewyrchu gwybodaeth yr uwch-reolwyr. Yn 2024/25, mae’r tîm uwch-reoli yn cynnwys y Prif Weithredwr, y Cyfarwyddwyr Gweithredol a’r Aelodau Annibynnol (Cyfarwyddwyr Anweithredol), Cyfarwyddwr Gwasanaethau Digidol Gofal Sylfaenol, Cymunedol ac Iechyd Meddwl, Cyfarwyddwr Pobl a Datblygu Sefydliadol, ac Ysgrifennydd y Bwrdd.

Y Gwerth Trosglwyddo Cyfwerth ag Arian Parod (CETV) yw gwerth cyfalafedig a aseswyd gan actiwari o fuddion cynllun pensiwn a gronnwyd gan aelod ar adeg benodol. Mae’r buddion a werthir yn cynnwys buddion cronedig yr aelod ac unrhyw bensiwn dichonol i’w dalu i ŵr neu wraig o’r cynllun.

Mae CETV yn daliad a wneir gan gynllun neu drefniant pensiwn i sicrhau buddion pensiwn mewn cynllun neu drefniant arall pan fydd aelod yn gadael a dewis trosglwyddo buddion y cynllun blaenorol. Mae ffigurau pensiwn yn ymwneud â buddion y mae’r unigolyn wedi’u cronni o ganlyniad i’w aelodaeth gyfan o’r cynllun, nid dim ond gwasanaeth mewn swydd uwch y mae datgeliad yn berthnasol iddo.

Mae’r ffigurau CETV a manylion pensiwn eraill yn cynnwys gwerth unrhyw fuddion pensiwn a drosglwyddwyd i gynllun pensiwn y GIG, ac unrhyw fuddion ychwanegol a gronnwyd drwy brynu blynyddoedd ychwanegol o wasanaeth pensiwn.

Cyfrifir CETVs o fewn y canllawiau a’r fframwaith a ragnodir gan Sefydliad a Chyfadran yr Actwariaid.

Cynnydd Gwirioneddol mewn CETV – Mae hyn yn adlewyrchu cynnydd CETV a ariannwyd gan y cyflogwr. Mae’n ystyried cynnydd mewn pensiwn cronedig oherwydd chwyddiant, cyfraniadau’r gweithiwr, a gwerthoedd buddiannau trosglwyddadwy eraill.