Adroddiad Staff
Nifer yr uwch aelodau staff
Ar 31 Mawrth 2025, roedd 15 aelod ar y Bwrdd, gyda phump ohonynt yn Gyfarwyddwyr Gweithredol, tri Chyfarwyddwr a chwe Aelod Annibynnol gan gynnwys Cadeirydd ac Is-Gadeirydd IGDC.
Niferoedd a Chyfansoddiad Staff ar 31 Mawrth 2025
Tabl 1 Dadansoddiad o staff yn ôl Grŵp (Ffigurau a gyflenwyd gan Gyllid ac yn cynnwys contractwyr)
Tabl 2 Dadansoddiad yn ôl Rhywedd y Bwrdd a'r Cyfarwyddwyr - Diweddarwyd ar 31 Mawrth 2025
Tabl 3 Dadansoddiad yn ôl Rhywedd fesul Tîm Gweithredol a Chyflogeion Eraill ar 31 Mawrth 2025
Tabl 4 Dadansoddiad yn ôl Rhywedd ac yn ôl Band
Data absenoldeb oherwydd salwch
Mae'r Tîm Pobl a Datblygu Sefydliadol yn gweithio'n agos gyda phob Cyfarwyddiaeth i gefnogi a rheoli lles pobl ac absenoldeb salwch IGDC. Datblygir adroddiadau perfformiad misol ar gyfer Cyfarwyddiaethau a chydweithwyr Gweithredol i fonitro salwch. Mae IGDC hefyd yn cynnig mynediad at Wasanaeth Iechyd Galwedigaethol i’w weithwyr a mynediad at Raglen Gymorth i Weithwyr, y gall aelodau teulu ei defnyddio am ddim hefyd.
Yn ystod 2024-25, roedd y rhan fwyaf o absenoldebau unigol oherwydd annwyd a ffliw tra bod y nifer uchaf o ddiwrnodau gwaith a gollwyd yn ganlyniad i straen a phryder.
Mae tabl 5 isod yn dangos y lefelau absenoldeb salwch yn ystod 2024/25. Y gyfradd gyfredol erbyn mis Mawrth 2025 yw 2.9% sy'n feincnod ffafriol iawn ar draws GIG Cymru ac mae Tabl 6 yn dangos nifer y dyddiau a gollwyd oherwydd absenoldeb oherwydd salwch.
Tabl 5 Canran Absenoldeb Salwch 2024/25
Tabl 6 Nifer y Diwrnodau Gwaith a Gollwyd oherwydd Salwch
Polisïau Staff a Weithredwyd yn ystod y Flwyddyn Ariannol
Mae asesiad yn cael ei gynnal ar holl bolisïau a gweithdrefnau DHCW o'u heffaith ar gydraddoldeb yn erbyn y naw nodwedd warchodedig, er mwyn sicrhau nad ydynt yn gwahaniaethu yn erbyn unrhyw un sy'n gwneud cais i weithio i DHCW neu sydd eisoes yn cael eu cyflogi ganddo. Mae'r holl bolisïau a gweithdrefnau ar gael ar wefan DHCW.
Yn ystod y flwyddyn, mabwysiadwyd a gweithredwyd polisïau ychwanegol, gan gynnwys Polisi Colli Beichiogrwydd Cymru Gyfan. Yn ogystal, mae Polisi Cydraddoldeb, Amrywiaeth a Chynhwysiant DHCW a Polisi Pensiynau Hyblyg yn aros am awdurdodiad.
Iechyd a Llesiant
Yn DHCW, rydym wedi ymrwymo i greu gweithlu iach, ymgysylltiedig a gwydn. Dros y flwyddyn ddiwethaf, rydym wedi cymryd dull rhagweithiol i gefnogi llesiant gweithwyr drwy gyflwyno amrywiaeth o fentrau i gefnogi iechyd corfforol, meddyliol a chymdeithasol. Mae rhagor o wybodaeth ar gael yn yr Adroddiad Perfformiad.
Cydraddoldeb, Amrywiaeth a Chynhwysiant
Mae DHCW wedi ymrwymo i feithrin gweithle cynhwysol a chefnogol. Mae ein Cynllun Cydraddoldeb Strategol (SEP), a gymeradwywyd ym mis Mawrth 2023 a’i gyhoeddi ym mis Ebrill 2023, yn tynnu sylw at ein hymrwymiad i atal bwlio a gwrth-hiliaeth. Datblygwyd y cynllun mewn partneriaeth â chynrychiolwyr staff, gweithwyr, a rhanddeiliaid allanol allweddol.
Sefydlwyd y Rhwydwaith Cydraddoldeb, Amrywiaeth a Chynhwysiant ym mis Mai 2023 ac mae'n cyfarfod bob dau fis i godi ymwybyddiaeth, arwain digwyddiadau, a chefnogi amcanion SEP. Mae Hyrwyddwyr y Rhwydwaith yn chwarae rhan allweddol wrth hyrwyddo amrywiaeth a chynhwysiant. Yn Chwarter 4 (2024–25), bydd y rhwydwaith yn cael ei adnewyddu, gan groesawu aelodau newydd, gyda rhestr wedi’i diweddaru i’w gyhoeddi yn Chwarter 1 (2025–26).
Ein Prif Ymrwymiadau a'n Cynnydd
Rydym wedi nodi pum ymrwymiad allweddol, wedi’u harwain gan ein Strategaeth Pobl a Datblygu Sefydliadol. Isod mae'r camau a gymerwyd i gyflawni'r ymrwymiadau hyn.
Ymrwymiad 1 – Cefnogi ein Pobl
Mae Rhwydwaith Cydraddoldeb, Amrywiaeth a Chynhwysiant DHCW yn cynrychioli pob un o'r naw nodwedd warchodedig o dan y Ddeddf Cydraddoldeb. Mae ei aelodaeth gynyddol yn sbarduno newidiadau cadarnhaol mewn polisïau a diwylliant y gweithle.
Mae Cymorth Cyntaf Iechyd Meddwl hyfforddedig ar gael i roi cefnogaeth gyfrinachol i weithwyr.
Ymrwymiad 2 – Addysgu a Dwyn Pawb i Gyfrif
Hyfforddiant Cydraddoldeb, Amrywiaeth a Hawliau Dynol – mae 99% o staff wedi cwblhau hyfforddiant gorfodol.
Hyfforddiant Gwrth-Hiliaeth – mae 82% o staff wedi cwblhau'r modiwl gorfodol (ym mis Chwefror 2025).
WRES (Safon Cydraddoldeb Hil y Gweithlu) – Cynhaliwyd cyfarfod briffio’r Bwrdd i drafod cynnydd, risgiau ac argymhellion.
Asesiadau Effaith ar Gydraddoldeb (EIA) – Ar gyfartaledd, cynhaliwyd tri EIA bob mis i werthuso effaith prosiectau, polisïau a chynlluniau newydd ar gydraddoldeb a chynhwysiant.
Ymrwymiad 3 – Defnyddio Data i Ysgogi Newid
Mae data yn llywio adroddiadau mewnol ac yn cefnogi cydymffurfiaeth â safonau cydraddoldeb Llywodraeth Cymru.
Mae Dangosfyrddau Data Recriwtio yn Power BI yn olrhain demograffeg, cynnydd a chynrychiolaeth amrywiaeth ymgeiswyr i sicrhau proses recriwtio deg.
Ymrwymiad 4 – Deall Heriau a Rhwystrau
Mae timau Pobl a Datblygu Sefydliadol yn gweithio i ddeall heriau’r gweithlu yn well, yn enwedig ar gyfer unigolion ag anableddau anweledig neu anableddau nad ydynt yn rhai corfforol.
Mae Dadansoddiad o Gyfweliad Ymadael a'r Rhaglen Mynediad i Waith yn helpu i nodi ffyrdd o wella cefnogaeth yn y gweithle.
Cyflogwr Hyderus o ran Anabledd – Mae 8% o'r gweithlu (ym mis Chwefror 2025) wedi datgan anabledd ar y Cofnod Staff Electronig. Mae DHCW yn darparu addasiadau rhesymol i gefnogi gweithwyr.
Ymrwymiad 5 – Arweinyddiaeth a Nawdd
Mae'r Bwrdd a'r Tîm Gweithredol yn cefnogi'r agenda Cydraddoldeb, Amrywiaeth a Chynhwysiant yn weithredol.
Mae DHCW yn cymryd rhan yng Ngrwpiau Cydraddoldeb GIG Cymru Gyfan, gan gynnwys y Grŵp Llywio Cydraddoldeb Hil y Gweithlu a'r Grŵp Arweinyddiaeth Cydraddoldeb.
Digwyddiadau Diwylliannol ac Ymgyrchoedd Ymwybyddiaeth – Cynlluniodd a chynhaliodd y Rhwydwaith EDI ddigwyddiadau ar gyfer Mis Hanes Pobl Dduon, Mis Treftadaeth De Asia, Diwali, a dathliadau allweddol eraill.
Cyflawniadau Allweddol yn 2024–25
Mwy o gyfranogiad yn Her Gamu DHCW, gan hyrwyddo lles a chynhwysiant.
Digwyddiadau llwyddiannus, gan gynnwys sylw ar wahaniaethu ar sail gwallt yn ystod Mis Hanes Pobl Dduon a sesiynau ymwybyddiaeth ar gyfer dathliadau diwylliannol allweddol.
Lansiwyd Gweithdai Cymorth Cyfweliadau yn Chwarter 3 i gynorthwyo staff gyda dyrchafiad a datblygiad gyrfa.
Cadarnhaodd archwiliadau allanol fod yr ardystiad ar gyfer BS 76000 (Gwerthfawrogi Pobl) ac ISO 30415 (Amrywiaeth a Chynhwysiant) yn parhau.
Ymgysylltodd Uwch Arweinwyr â Llywodraeth Cymru ar Safonau Cydraddoldeb Hil y Gweithlu a chymryd rhan mewn digwyddiadau diwylliannol.
Mae DHCW yn parhau i fod wedi ymrwymo i feithrin amgylchedd cynhwysol a chefnogol lle gall pob gweithiwr ffynnu.
Adrodd ar gynlluniau iawndal eraill – pecynnau ymadael
Yn ystod 2024–25, bu un pecyn ymadael wedi’i dalu neu ei gymeradwyo.
Gwariant ar Wasanaethau Ymgynghorol
Yn ystod 2024–25, gwariodd DHCW £0.325 miliwn o’i gyllid refeniw ar wasanaethau ymgynghori allanol. Mae hyn yn cynrychioli ostyngiad o 57% o’i gymharu â 2023–24.
At ddibenion cyfrifon statudol, diffinnir ymgynghoriaeth fel aseiniadau â therfyn amser neu ad-hoc sy’n ymwneud â darparu cyngor proffesiynol a strategol nad yw’n uniongyrchol gysylltiedig â gweithgareddau sy’n darparu cynhyrchion digidol.
Enghreifftiau o wasanaethau ymgynghorol yw:
- Ffioedd cyfrifyddu a masnachol
- Ffioedd cyfreithiol
- Ffioedd dylunio
- Ymgynghoriaeth a chyngor TG
Gwariant ar Staff Dros Dro
Yn ystod 2024–25, gwariodd DHCW £1.628 miliwn o’i gyllid refeniw ar staff dros dro, gan gynnwys gweithwyr asiantaeth, rheolwyr dros dro, a chontractwyr arbenigol.
Mae hyn yn cynrychioli cynnydd bach mewn gwariant, yn bennaf oherwydd staff dros dro yn cefnogi’r gwaith adnewyddu a mudo cyfrifiaduron personol, y Prosiect Mudo i’r Cwmwl a’r Ganolfan Ddata, a mentrau Cymorth Brechlynnau yn ystod y flwyddyn.
Sicrwydd treth ar gyfer penodiadau oddi ar ar y gyflogres
Yn dilyn Adolygiad o’r Trefniadau Treth ar gyfer Penodiadau’r Sector Cyhoeddus a gyhoeddwyd gan y Prif Ysgrifennydd i’r Trysorlys ar 23 Mai 2012, mae’n ofynnol i adrannau gyhoeddi gwybodaeth am eu swyddi sydd â thâl uchel a/neu uwch swyddi nad ydynt ar y gyflogres. Mae’r wybodaeth, sydd wedi’i chynnwys yn y tri thabl isod, yn cynnwys yr holl penodiadau oddi ar y gyflogres ar 31 Mawrth 2025 ar gyfer y rhai sy’n ennill mwy na £245 y dydd ar gyfer yr AIA craidd ac unrhyw sefydliadau a gynhelir.
Tabl 7: Penodiadau gweithwyr oddi ar y gyflogres â chyflog uchel ar 31 Mawrth 2025, gan ennill £245 y diwrnod neu fwy.
Tabl 8: Pob gweithiwr oddi ar y gyflogres â chyflog uchel a gyflogwyd ar unrhyw adeg yn ystod y flwyddyn a ddaeth i ben 31 Mawrth 2025, gan ennill £245 y diwrnod neu fwy:
Tabl 9: Penodiadau nad oeddynt ar y gyflogres ar gyfer aelodau’r bwrdd, ac/neu uwch swyddogion gyda chyfrifoldeb ariannol sylweddol, rhwng 1 Ebrill 2024 a 31 Mawrth 2025.
Datganiad Sicrwydd
Cadarnhaf nad oes unrhyw wybodaeth archwilio berthnasol yn yr Adroddiad Blynyddol nad yw Archwilio Cymru yn ymwybodol ohoni. Fel Prif Weithredwr, rwyf wedi cymryd pob cam i wneud fy hun yn ymwybodol o unrhyw wybodaeth berthnasol a sicrhau bod Archwilio Cymru yn ymwybodol o’r wybodaeth honno.
Dyddiad:
26 Mehefin 2025
Llofnodwyd gan:
Helen Thomas | Prif Weithredwr
